Lea-Artibai eta Mutriku

Lea Artibai Ikastetxean Prestakuntza Zikloa amaitu eta lanean dihardutenak %86 pasa dira. Mekanika arloan 20, Telekomunikazioak, Elektrizitatea eta Elektronikan 14, Muntaia eta mantenimenduan 9 eta beste lanbidetan 7.

Gaiaren inguruko xehetasunak jakiteko Laneratze zerbitzuko arduradunarengana Xabier Urangarengana jo dugu eta hauxe esan digu: “Krisia leku guztietara iristen ari da eta gure zerbitzuan ere sumatu dugu lan eskaintza maila jaitsi egin dela azken hilabetean. Irailean, adibidez, 15 laguni eskaini diogu lana”.

Ikasketak egitea eta lanerako prestakuntza jasotzea gero eta beharrezkoagoa da lan mundura iristeko. Enpresariek beren lantegiko azterketa egin eta perfila definituta zuzentzen dira Laneratze zerbitzura beren langile eskaerak egitera. “Guk daukagun langile zerrendatik, eskaeraren ezaugarriak erabat betetzen dituena aukeratzen dugu eta berari jakinarazi lan eskaintza hori dagoela. Perfilaren ezaugarriak erabat betetzen ez badira, hurbilen dagoenari ematen zaio lan eskaintzaren berri eta ia beti bete egiten dira enpresariak dituen beharrak” dio Laneratze zerbitzuko arduradunak.

Ikasketak aukeratzeko orduan, garrantzitsua izaten da norbere gustuko ikasketak egitea, seguruenik gero lanean ere eroso arituko delako, baina bada, bigarren osagarri bat ikasketak hautatzeko erabakian eragina duena: soldata. Prestakuntza Zikloa amaitu eta gero bataz besteko soldatarik handiena osasungintzan radioterapian ari direnak dute ia 1500 euro garbi hilean, ondoren fundizioko langileak datoz 1350 euro garbi, eta 1200 euro garbi bueltan dabiltza kultur animatzaileak, igeltseroak, plastiko eta kautxu teknikariak eta mantenimendukoak , 1000 euro inguru irabazten dute nekazaritza intentsiboan ari direnak, audiobisualetako teknikariak, auto-konpontzaileak, telekomunikazio, elektrizitate, elektronika eta informatikan dihardutenak. Apurtxo bat gehiago mekanikoak eta soldadurako teknikariak.

Sarritan lanpostua kolokan ikusten denean bururatu ohi da berriro ere ikasten hastea, eta egun ikasketak eskaintza asko zabaldu da; alde batetik araututako ikasketek eskaintzen duten prestakuntza eta tituluak daude eta bestetik “etengabeko prestakuntzak” eskaintzen dituenak. Lanean zein langabezian daudenei eskaintzen zaizkien ikastaroen bidez gero eta eskuragarriagoa da lanerako prestatzea.

Krisi garaian egonda pozgarria da oraindik ere lan eskaintzak badaudela jakitea.